ناوه‌ڕۆك
دراوی ڕیاڵی سعودی
ڕیاڵ دراوی فەرمیی شانشینی عەرەبیی سعودییە، هەر ڕیاڵێک دابەش دەکرێت بۆ 100 هەلەلە، ڕیاڵ لە بانکی ناوەندیی سعودییەوە بڵاودەکرێتەوە و بە زێڕ پشتگیری دەکرێت، بۆیە هیچ کۆت و بەندێک لەسەر ئاڵوگۆڕی دراوەکە نییە و بە بێ هیچ ئاستەنگێک دەکرێت پارە بۆ و لە سعودییەوە بگوازرێتەوە، لە ساڵی 1986ـەوە یەک دۆلاری ئەمریکی بەرامبەرە بە 3.75 ڕیاڵ و دراوەکە لەو کاتەوە بەندە لەسەر دۆلار.
مێژووی ڕیاڵی سعودی
مێژووی ڕیاڵی سعودی دەگەڕێتەوە بۆ سەردەمی ''شا عبدالعزیز'' پاش ئەوەی ناوی وڵاتەکەی لە شانشینی حیجازەوە گۆڕی و کردی بە شانشینی عەرەبی سعودی، ڕەشنووسێکی فەرمیی شاهانە بە ژمارەی (2716) دەرچوو لە بەرواری (7-جمادی الأولی-1351 هـ) کە هاوکاتە لەگەڵ (22-9-1932) و بڕیاری دابوو کە دەبێت لەمەودوا نازناوی شای شانشینی عەرەبیی سعودیی بۆ بەکاربێت لە جیاتی ''شای حیجاز و نەجد و ناوچەکانی دەوروبەری''.
ئەم نازناوە بە فروانی بەکارنەهێنرا هەتا ساڵی 1354ـی کۆچی یاخود 1935ـی زاینی، کاتێک یەکەم دراوی سعودی خرایە بازاڕەوە و ناوە نوێیەکەی وڵاتی پێوە چاپ کرابوو، لە سەردەمی شا سعودی کوڕی عەبدولعەزیز و فەیسەڵ و خالید کۆمەڵە وەشانێکی نوێ لە دراوەکە بڵاوکرانەوە کە پێکهاتبوون لە:
- 1 ڕیاڵ.
- 5 ڕیاڵ.
- 10 ڕیاڵ.
- 50 ڕیاڵ.
- 100 ڕیاڵ.
لە سەردەمی شا فەهدی کوڕی عبدالعزیز جۆرێکی نوێ بڵاوکرایەوە کە جۆری 500 ڕیاڵ بوو و وێنەی شا عبد العزیزی لەسەر بوو.
ڕیاڵی سعودی لە ئێستادا
دراوە کانزاییەکان
ئەم جۆرانە لە ساڵی 2016 بەکاردێن:
- 1 هەلەلە
- 5 هەلەلە
- 10 هەلەلە
- چارەکە ڕیاڵێک
- نیو ڕیاڵ
- یەک ڕیاڵ
- 2 ڕیاڵ
دراوە کاغەزییەکان
ئەم جۆرە کاغەزیانە سەر بە وەشانی ساڵی 2016ـن و لە ئێستاشدا بەکاردێن:
- 5 ڕیاڵ کە ڕەنگی مۆرە و وێنەی شا سەلمان و یەکێک لە کێڵگە نەوتییەکانی چارەگی بەتاڵی وڵاتەکەی لەسەرە.
- 10 ڕیاڵ کە ڕەنگی قاوەییە و وێنەی شا سەلمان و کۆشکی چوارگۆشەی لەسەرە کە دەکەوێتە ڕیازەوە.
- 50 ڕیاڵ کە ڕەنگی سەوزە و وێنەی شا سەلمانی لەسەرە لەگەڵ گومبەتە ئاڵتوونییەکەی مزگەوتی ئەقسا لە قودس.
- 100 ڕیاڵ کە ڕەنگی سوورە و وێنەی شا سەلمانی لەسەرە لەگەڵ وێنەیەکی گومبەتە سەوزەکەی مزگەوتی پێغەمبەر ﷺ.
- 500 ڕیاڵ کە وێنەی شا عبدالعزیز بن عبدالحرمن آل سعودی لەسەرە لەگەڵ وێنەیەکی کەعبەی پیرۆز.
