ناوه‌ڕۆك
کارکردنی زۆر
ئەو کەسانەی کە کار دەکەن هەوڵ دەدەن کە باشترین کاری خۆیان پێشکەش بکەن، بەڵام گرنگە کە هەموو کارێک بەشی خۆی پێ بدرێت و زیان نەگەیەنێت بە تەندروستیمان، هەندێک کەس بە جۆرێک هۆگری کارەکەیان بوون کە تەواوی ژیانیان لەو کارەدا بەسەر دەبەن بە جۆرێک کە ئامادەن تەندروستی جەستە و دەروونی خۆیان بکەنە قوربانی ئەو کارە، هەندێک نیشانە ئەوە دەردەخەن کە زیاد لە پێویست کار دەکەیت و پێوستت بە پشوودانێکی باشە و پێویستە وازبهێنیت.
بە ئەم نیشانانەدا بزانە کە پێویستت بەوەیە کە واز لە کارەکەت بهێنیت
هەستی نەرێنی و دڵگرانیت زۆر بووە
لێکۆڵینەوەکان ئەوەیان دەرخستووە کە پەیوەندییەکی باش هەیە لە نێوان کاری زۆر و خەمۆکیدا، هەستی بێزاری و دڵگرانی لە لای هەموو کەسێک دروست دەبێت بەڵام ئەگەر ئەم هەستە زۆر درێژەی کێشا و بووە هۆی خەمۆکی ئەوا دەبێت پشوویەک بدەیت.
سادەترین هەڵەکانی ماڵەوە ئازارت دەدات
بە هۆی زۆر ماندووبوونەوە دەکرێت کە تووڕە بیت هەندێک جار، بەڵام کاتێک کە لە بچووکترین شت تووڕە دەبیت و زوو هەڵ دەچیت و ئارامیت نەماوە ئەوەیان شتێکی جیاوازە.
متمانە بەخۆبوونی کەم و دڵەڕاوکێی زۆر
زورینەی ئەوانەی کە زۆر کار دەکەن هەوڵ دەدەن کە تواناکانی خۆیان پیشانی هەموو کەسێک بدەن، هەر بۆیە ڕووبەڕووی ئاڵنگاریی زۆر دەبنەوە و وردە وردە متمانە بە خۆبوونیان کەم دەبێتەوە و تووشی دڵەڕاوکێ دەبن.
سەرئێشەی بەردەوام
شەقیقە نیشانەیەکە بۆ کارکردنی زۆر، ماندووبوونی چاو بە هۆی سەرنج خستنە سەر کارەکە هۆکارێکە تاکوو تووشی سەرئێشەی بەردەوام ببیت.
کێشەکانی دڵ و هەناسەدان
زۆر کار کردن لە ڕۆژێکدا هۆکارێکە تاکوو کێشەی جەستەیت بۆ دروست بکات بەتایبەت کێشەکانی دڵ و کۆئەندامی هەناسە، توێژینەوەکان ئەوەیان دەرخستووە کە زیاتر لە ١١ کاتژمێر کارکردن لە ڕۆژێکدا مەترسی زیادبوونی نەخۆشییەکانی دڵ زیاد دەکات.
ئازاری شان و مل بە هۆی زۆری کارکردنەوە
بە هۆی زۆر کارکردنەوە و بەردەوم دانیشتن یاخود جوڵانی زۆر شان و ملت بە بەردەوامی ئازاری دەبێت، گرنگە کە نەهێڵیت ئەمە ئاوا تێبپەڕێت و تەندروستی خۆت پێش هەموویەتی.
بەردەوام ئیزن وەرگرتن
کاتێک بە هۆی ماندوویەتی یاخود ئازاری شان و ملتەوە بەردەوام ئیزن وەردەگریت کە کار نەکەیت و نەچیتە سەر کارەکەت، ئیتر کاتی ئەوە هاتووە که بەیەکجاری وازبهێنیت و پشوو بدەیت.
